Thunder mikulit og team record

CEBU, Philippines — Si NBA scoring leader Shai Gilgeous-Alexander mipabuto og 37 puntos sa dihang gilampornas sa Oklahoma City Thunder ang Memphis Grizzlies, 125-104, aron pagposte og team record uban ang ika-61 nilang daog ning season.

Ang Thunder nakakuha sab og 20 puntos gikan ni Jalen Williams ug 18 puntos ug 11 ka rebounds gikan ni Isaiah Hartenstein sa pag-inat sa nagkadena nilang daog ngadto sa walo ka duwa dayon na ngadto sa pagbuak sa karaang marka alang sa labing daghan nilang daog usa ka regular season.

Nagkupot na karon ang Thunder og 61-12 rekord ug hingpit na nilang nasakmit ang titulo sa Western Conference.

Samtang ang lider sa Eastern Conference nga Cleveland Cavaliers misaka sa ilang baraha ngadto sa 59-14 human gipatikangkang ang San Antonio Spurs, 124-116.

Si Donovan Mitchell miharos og 25 puntos ug 14 ka assists samtang si Jarrett Allen mipaulbo og 29 puntos ug 15 ka rebounds aron pangulohan ang Cavs.

Didto sa Chicago, si Josh Giddey nakahimo og usa ka dakong milagro human nasud ang buzzer-beater niyang half-court shot nga nagtuboy sa Bulls ngadto sa makapakurat nga kadaogan batok sa Los Angeles Lakers, 119-117.   

Si Giddey mirehistro og triple-double uban ang 25 puntos, 14 ka rebounds ug 11 ka assists, samtang si Coby White mitali og 26 puntos alang sa Bulls.

Si Austin Reaves mikadlit og 30 puntos, si Luca Doncic mihipos og 25 puntos ug 10 ka rebounds samtang si LeBron James midugang og 17 puntos ug 12 ka assists apan wala mosaler ang maanindot nilang salida alang sa Lakers.