Checkmate Cebu 2025 kasado na karong Marso 30
CEBU, Philippines — Kapin sa P100,000 nga ganting salapi ang giandam alang sa mga mananaog sa Checkmate Cebu 2025, usa ka inter-school ug open chess tournament nga gikatakda karong Marso 30 diha sa The Atrium sa Robinsons Galleria Cebu.
Giorganisa sa Cebu School of Chess inabagan sa Singapore School of Cebu, ang usa ka adlaw nga pinug-anay sa utok naglangkob og Under 20 (juniors), Under 14 (kiddies) ug Under 16 (unrated) nga mga kategoriya.
Ang Under 20 champion mobulsa og P12,000 samtang ang mopahiluna sa ikaduha ngadto sa ikalimang dapit makadawatg og P8,000, P5,000, P3,000 ug P2,000. Ang masud sa Top 10 adunay P1,000 nga konsolasyon matag usa.
Ang Top 4 sa Under 14 mokubra og P7,000, P5,000, P3,000 ug P2,000 samtang ang Top 3 sa Under 16 mokabi og P5,000, P3,000 ug P2,000.
Aduna say maanindot nga mga tropeyo, medalya ug insentibo ang mga tunghaan ug indibidwal nga manghawod sa tagsa-tagsa nila ka dibisyon.
Ang rehistrasyon nagkantidad og P500. Kadtong interesado nga mosalmot gihatagan kutob lamang karong Martes, Marso 25, aron magpahistro. Puyde nilang bisitahon kining maong link:bit.ly/CheckMateCebu2025.
Alang sa dugang detalye, mahimong mokontak ni Kevin Yap (09458559800) o Minch Arranguez (09190677030).
- Latest
