Celtics mipakaging sa Nets

CEBU, Philippines — Ang Boston Celtics mitikang sa ilang korte nga wala ang duha nila ka mga bitoon nga sila si Jayson Tatum ug Jaylen Brown.  Bisan pa man niini, nakahatag gihapon sila og kalipay sa ilang fans.

Salamat ni Kristaps Porzingis ug sa rookie nilang si Baylor Scheierman nga mikumbati og maayo aron pangulogan ang Celtics ngadto sa 104-96 nga pagpayaka sa Brooklyn Nets sa NBA kagahapoing adlawa didto sa TD Garden sa Boston, Massachusetts.

Si Porzingis mipasud og siyam sa 13 niya ka itsa dayon na ngadto sa pagkadlit og 25 puntos.

Sa ikaduha niyang duwa sa iyang pagbalik gikan sa walo ka duwa nga pahuway, si Porzingis milangkat sab og 13 kqa rebounds, usa ka steal ug tulo ka blocks.

Wala sab magpabitin si Scheierman nga mitali og 12 sa career-high niyang 20 puntos sa katapusang kuwarter nga nahimong taytayan sa Celtics ngadto sa pagpayaka sa Nets.

"He's got a high level of toughness," dason pa ni Celtics coach Joe Mazzulla agi'g pagdayeg ni Sheierman nga nakadawat og standing ovation gikan sa ilang fans sa dihang mibiya siya sa korte.

Gikalipay kini og maayo ni  Scheierman.

"Probably a top-three environment I've ever been a part of," matud pa sa 30th pick sa Celtics niadtong 2024 NBA Draft. "It's just special... the best sports town in the country, best city in the country."

Human sa labing uwahi nilang kadaogan, ang Celtics mipahugot sa ilang pagkupot sa ikaduhang puwesto sa Eastern Conference uban ang 50-19 rekord.