Ginebra miresbak sa TNT

CEBU, Philippines — Ang Barangay Ginebra Kings nakaipsot sa TNT Tropang Giga, 71-70, sa kulbahinam nga Game 2 aron tablahon ang ilang best-of-seven PBA Season 49 Commissioner's Cup finals sa baraha nga 1-1 niadtong Dominggo sa gabii didto sa Mall of Asia Arena sa Pasay City.

“They just showed true grit all the way through the game,” matud pa ni Ginebra coach Tim Cone. “We knew if we’re going to have a chance in the series, we have to show that character and that true grit.”

Namugnaw ang Gin Kings human miabante og 15 puntos, 34-19, sa sayong bahin sa ikatulong kuwarter ug gipahimuslan kini og maayo sa Tropang Giga dayon na ngadto sa pag-ilog sa labaw, 70-67 sa pinal nga 2:31 sa duwa.

Apan si Justin Brownlee misalbar sa Kings pinaagi sa pagpasud sa malisud niyang acrobatic layup ug duha ka free throws nga nakapalabaw og balik sa Ginebra.

Gidepensaan dayon og maayo sa Kings si Rondae Hollis-Jefferson sa duha niini ka krusyal nga opensiba sa katapusang 46.9 segundos aron silyohan ang ilang pagpanimalos sa 95-89 nilang kaparotan sa TNT sa pasiunang duwa sa serye.

Si Brownlee miharos og 35 puntos ug 11 ka rebounds alang sa Ginebra samtang si Scottie Thompson midugang og 16 puntos ug usa ka dosena nga rebounds. Si Hollis-Jefferson mihipos og 25 puntos ug 15 ka rebounds sa pilderong Tropang Giga, nga mi-iskor lamang og 19 puntos sa first half.