Sa iyang pagbalik sa Celtics Porzingis mihimo dayon og kasikas Pritchard, Kerr mikulit og rekords

CEBU, Philippines — Si Kristaps Porzingis mipabuto og 24 puntos sa iyang pagbalik human makapalta og walo ka duwa samtang si Payton Pritchard mikulit og NBA rekord aron ituboy ang defending champion Boston Celtics ngadto sa 115-113 nga pagpiog sa Brooklyn Nets kagahapon didto sa Barclays Center sa Brooklyn, New York.

Ang alas nilang si Jason Tatum miamot og 20 puntos, walo ka rebounds ug walo sab ka assists samtang si Pritchard mipupo og 22 puntos gawas nga mikadlit og rekord alang sa labing daghan nga 3-pointers sa usa ka season sa usa ka reserve prayer.

Si Pritchard milansang sa ika-219 niyang tres ning season sa ikaupat nga kuwarter.

Sa kinatibuk-an, mipasud siya og pito sa 11 niya ka itsa apil na ang lima ka tres ug tulo ka sagunson nga free throws sa pinal nga 8.2 segundos aron silyohan ang ika-13 nga daog sa Celtics sa miagi nilang 16 ka duwa.

Ang Celtics padayong nagbarog sa ikaduhang dapit sa Eastern Conference bitbit ang 49-19 nga baraha.

Sa laing bahin, si Steve Kerr, nga migiya sa Golden State ngadto sa upat ka korona sa NBA, nahimong labing daogan nga coach sa kasaysayan sa Warriors.

Iyang gilabyan ang 557 ka daog nga narehistro ni anhing Al Attles sa dihang gipayaka sa Warriors ang bisita nilang New York Knicks, 97-94.

Si Stephen Curry mi-iskor og 28 puntos apil na ang tulo ka free throws sa katapusang 14.1 segundos aron pangulohan ang Warriors sa ikapito nilang sunod-sunod nga daog ug ika-14 sa kinatibuk-an sa miagi nilang 16 ka duwa.

Sa laing bahin, si Shai Gilgeous-Alexander mipaulbo og 48 puntos aron ibandera ang Oklahoma City Thunder ngadto sa 113-107 nga pagpakaging sa Detroit Pistons.

Mikolekta sab siya og unom ka assists, upat ka rebounds ug tulo ka steals alang sa Thunder nga nagkupot na karon og 55-12 nga baraha ug 18-3 na sukad niadtong Pebrero.

Didto sa Memphis, si Jaren Jackson Jr. miharos og 31 puntos ug si Desmond Bane midugang og 22 puntos, 10 ka rebounds ug walo ka assists aron ituboy ang Grizzlies ngadto sa 125-91 nga paglampaso sa Miami Heat.

Ang Houston Rockets miinat sa sagunson nilang daog ngadto sa unom ka duwa ug gitabla ang 43-25 nga marka sa Grizzlies ug Denver Nuggets human ilang gitumba ang Chicago Bulls, 117-114.

Si Jalen Green maoy nangu sa Houston uban ang 28 puntos samtang si Alperen Sengun midonar og 24 puntos ug 15 ka rebounds alang sa Rockets.