LeBron nagmangtas, nangu sa Lakers batok Warriors
CEBU, Philippines — Si LeBron James miduyog ni NBA icon Michael Jordan isip mao lamang nga mga players sa kasaysayan sa liga nga mi-iskor og 40 puntos sa usa ka duwa sa edad nga 40 anyos human siya mirapido og 42 puntos sa dihang gipayaka sa Los Angeles Lakers ang Golden State Warriors, 120-112, kagahapong adlawa didto sa Crypto.com Arena sa LA, California.
Nag-40 anyos niadto lamang Disiembre 30, si James mipakita na sab og dalaygong performance nga naglangkob og makapakurat nga 3-pointer gikan sa half-court logo. Sa kinatibuk-an, miposa siya og unom ka tres, ang katapusan nakapaginhawa og lawom sa Lakers uban ang 115-106 nga labaw sa nahibilin nga 115-106 duwa.
Ang alas sa Warriors nga si Stephen Curry mibubo og 19 sa iyang 37 puntos sa katapusang kuwareter apan nakawang ang maanindot niyang salida.
Didto sa Boston, ang Dallas Mavericks mibihag sa defending champion Celtics, 127-120.
Si Klay Thompson mikadlit og 23 sa iyang 25 puntos sa first half, samtang si Kyrie Irving midonar og 19 puntos alang sa Mavs nga sa usa ka higayon naglabaw og 27 puntos.
Sa laing aksiyon, ang bitoon sa Minnesota nga si Anthony Edwards mipabuto og 41 puntos aron ituboy ang Timberwolves ngadto sa 127-114 nga pag-ugbok sa Houston Rockets.
Usa ka adlaw human sa 49 puntos niyang eksplosyon sa 127-108 nilang kadaogan batok sa Chicago Bulls, si Edwards mikulit og franchise record alang sa labing daghang duwa nga dunay iskor nga dili mominus og 40 puntos. Miabot na kini og 14 aron labyan ang marka ni Karl-Anthony Towns.
Dugang niini, ang 23-anyos nga si Edwards milansang og lima ka 3-pointers aron mamahimong labing bata nga NBA player nga naka-igo og 1,000 ka tres. Iyang gipapha ang rekord ni Luka Doncic, nga nakapasud og usa ka libo ka tres sa dihang nag-edad kini og 24 ka tuig ug 286 ka adlaw.
- Latest
