CEBU, Philippines — Wala man tuod ang duha nila ka mga bitoon nga sila si Joel Embiid ug Paul George apan ang Philadelphia 76ers nakamaneho pagpiog sa Los Angeles Lakers, 118-104, sa NBA kagahapong adlawa didto sa Wells Fargo Center sa Philadelphia, Pennsylvannia.
Salamat ni Tyrese Maxey, nga mipaulbo og 43 puntos aron aswaton ang Lakers ngadto sa ikatulo nilang sagunson nga daog.
Taliwala sa kapildihan, nadoble ang kaguol sa Lakers tungod kay ang sinaligan nilang big man nga si Anthony Davis mibiya sa unang kuwarter kay nayayay ang tiyan ug wala na makabalik pa.
Si LeBron James mipupo og 31 puntos, walo ka rebounds ug siyam ka assists apan nakawang ang iyang paningkamot kay naputol man ang upat ka sunod-sunod nga daog sa Lakers.
Didto sa Atlanta, si Jalen Green mi-iskor og 25 puntos sa dihang gipasukarap sa Rockets ang Hawks, 100-96, alang sa ikaupat nilang sunod-sunod nga daog.
Dako sab og naambag si Alperen Sengun nga miposte og 18 puntos ug 10 ka rebounds ingon man si Jae'Sean Tate nga mitampo og 16 puntos alang sa Rockets.
Sa laing bahin, ang Golden State Warriors mipayaka sa Utah Jazz, 114-103, bisan og wala ang alas nilang si Stephen Curry.
Si Dennis Schroder miposa og lima ka 3-pointers sa iyang 23 puntos aron pangulohan ang Warriors. Gipaluyohan siya nilang Brandin Podziemski ug Andrew Wiggins nga nagkumboya'g 39 puntos. Didto sa Portland, si Deni Avdija miharos og 30 puntos samtang si Anfernee Simons midonar og 25 puntos sa dihang gitumba sa Trail Blazers ang Milwaukee Bucks, 125-112.