CEBU, Philippines — Si International Master Joel Pimentel, Jr. maoy gikoronahang kampiyon sa Darcy's Workhorse Memorial Cup 2025 Open Rapid Chess Tournament niadtong Martes, Enero 28, didto sa Robinsons Galleria Cebu.
Gihuman ni Pimentel ang pito ka hugna nga kompetisyon bitbit ang perpektong 6.5 puntos aron kubrahon ang P9,000 nga premyo.
Sila si John Lester Belano ug Cyril Ortega parehong miposte og 6.0 puntos apan si Belano ang miangkon sa ikaduhang luna tungod sa mas taas niining tiebreaker.
Si Belano mibulsa og P7,000, samtang si Ortega nakadawat og P5,000 sa paglandig niya sa ikatulong dapit.
Sila si Richard Natividad ug National Master Rommel Ganzon mikabi og P3,000 ug P2,000 sa pag-okupar nila sa ikaupat ug ikalimang puwesto uban ang 5.5 puntos matag usa.
Naglangkob sa Top 10 mao sila si Allan Salientes, Arena IM Bonn Rainauld Tibod, Mark Lloyd Sy, Tsedekhaor Codilla uig Joel Pacuribot uban ang 5.0 puntos.