CEBU, Philippines — Kumpleto na ang linyada sa mga boksidor nga magsinukliay og kumo sa gikahinaman nga "Binukbukay sa Sugbo" boxing promotion nga gipasiugdahan ni Dr. Winley de la Fuente sa OX KBDF Gaming.
Ang giatngan nga pasundayag nga naglangkob og tulo ka WBO championship bouts gikatakda karong Pebrero 8 diha sa Nustar Resort and Casino Convention Center.
Sa main event, ang Koreanong si Jong Seon Kang (20-1, 11KOs) modepensa sa iyang trono isip WBO Global featherweight champion batok sa Hapon nga challenger nga si Ryuto Owan (13-1, 8KOs).
Ang Chinese nga si Yeerjialahasi Laayibieke (10-2, 7KOs) gikan sa Beijing manalipod sa iyang WBO Oriental super featherweight belt batok ni Rodex "The Tank" Piala (10-1, 1KO) sa ARQ Stable.
Sa laing sangka, ang kanhi WBO Asia Pacific ug Intercontinental champion nga Genesis "Azucal" Servania (35-4, 16KOs) makigsinukliay og kumo ni Aketelieti Yelejian (9-4-1, 2KOs) sa Shenzhen, China alang sa bakanting WBO Oriental lightweight title. Sa makalingaw nga undercards, si kanhi world minimumweight champion Vic "Vicous" Saludar (25-6, 15KO) makigharong ni Roldan Sasan (8-6-1, 3KOs).
Magpinaksitay sab ibabaw sa ring sila si Jason Balajadja vs Vergil Deguma, Rafie Jamero vs Yulie Hindoy, ug Tristan Jay Racho vs Aubrey Silot. Ang presyo sa mga ticket nakantidad gikan sa P2,900 (general admission) ngadto sa P5,700 (gold), P8,000 (VIP) ug P11,300 (ringside).