Bolts miangkon og luna sa PBA playoffs
CEBU, Philippines — Ang Meralco Bolts miwani sa San Miguel Beermen, 100-93, aron paglukat og ticket PBA Commissioner's Cup playoffs atol sa ilang road game didto sa Candon City Arena sa Ilocos Sur niadtong Sabado sa gabii.
Sila si Akil Mitchell, Chris Newsome ug Chris Banchero misidlak nga labing hayag sa dihang ang Bolts milansang sa ikatulo nilang sagunson nga daog nga nakapalig-on sa ilang tansa nga makasud sa Top 2.
Si Mitchell miharos og 26 puntos, 16 ka rebounds ug lima ka assists samtang sila si Newsome ug Banchero nagkumbinar og 39 puntos alang sa Meralco, nga mamugnaw human milabaw og 11 puntos, 70-59, sa ikatulong kuwarter apan namawi sa pinal nga singko minutos aron tumbahon ang Beermen.
Ang Bolts nagtabla karon uban ang NorthPort Batang Pier, Converge FiberXers ug Hong Kong Eastern sa ikaduhang puwesto bitbit ang managsamang 7-3 nga baraha.
Usa lamang ka duwa ang ilang gintang sa TNT Tropang Giga nga maoy nagkupot sa temporaryong liderato uban ang 6-2 rekord.
Ang Sugbuanong si June Mar Fajardo maoy nangu sa pilderong Beermen uban ang 20 puntos. Si CJ Perez mitali og 16 puntos apan ang import nilang si Malik Pope naposasan ngadto lamang sa 14 puntos sa iyang PBA debut human gihulipan si Jabari Narcis.
Ang Beermen natagak sa 4-5 apan nagpabilin sa ikawalong dapit. Nagsikit kanila ang Magnolia (4-6) ug ang Phoenix Super LPG ug NLEX Road Road Warriors nga parehong nagtangag og 3-6 nga marka.
- Latest
