Cavs namawi, Celtics nahagba

CEBU, Philippines — Si Donovan Mitchell mipabuto og 36 puntos sa dihang ang Cleveland Cavaliers milatigo sa Minnesota Timberwolves, 124-117, sa ilang duwa sa NBA kagahapong adlawa didtro sa Target Center sa Minneapolis, Minnesota.

Ang lider sa Eastern Conference miabot sa Minneapolis nga pildero sud sa duha ka higayon sa miagi nilang tulo ka duwa apil na ang makapadisyama nga 134-114 nga pagkulata nga ilang nahiaguman sa mga kamot sa Oklahoma City Thunder.

Apan human sila mabiyai og 11 puntos sa sayong bahin sa unang kuwarter, ang Cavs milusad og nagkayong opensiba dayon na ngadto sa pagkulit og impresibong kadaogan nga nakainat sa ilang rekord ngadto sa 35-6.

Sila si Mitchell ug Darius Garland maoy utok niini human ang duha ka mga bitoon sa Cavs nagkumboya'g 65 puntos.

Si Mitchell miduhang og walo ka rebounds ug pito ka assists samtang si Garland midonar og 29 puntos.

Si Anthony Edwards mipupo og 28 puntos samtang si Julius Randle mikolekta og 20 puntos, 14 ka rebounds ug siyam ka assists apan nakawang ang ilang paningkamot sa habig sa Wolves.

Didto sa Boston, si Trae Young mipatuasik og 28 puntos sa dihang gidagit sa Atlanta Hawks ang defending champion Boston Celtics, 119-115, sud sa overtime.

Ang Atlanta nagkupot na karon og 22-19 rekord samtang ang Celtics nagpabilin sa ikaduhang dapit sa East bitbit ang 29-13 nga baraha.