CEBU, Philippines — Andam na ang tanan alang sa 1st Mayor Raymond Alvin Garcia Invitational Basketball Tournament 2025 nga gikatakda karong Enero 25-31 diha sa Cebu City Sports Institute Gym sa Barangay Sawang Calero.
Si Cebu City Sports Commission (CCSC) Executive Director Allen Ceballos nagkanayon nga unom ka teams ang mopakita'g aksiyon sa usa ka semanang pinaksitay sa korte nga nagdalit og kinatibuk-ang P650,000 nga ganting salapi sa mga mananaog.
"Gusto namo nga buhion og balik ang basketball sa siyudad sa Sugbo pinaagi niining torneyo," matud pa ni Ceballos.
Mag-ilog sa titulo mao ang ARQ Builders/CM Farm, Solid North Patylist-EGS, Team Khalifa, Lymar Ballers, Stampede/Metro Cars, ug bisitang koponan gikan sa Iloilo.
Moduwa sila og single round robin sa eliminasyon diin ang Top 4 qualifiers moabante sa crossover semifinals. Ang mga mananaog magsangka dayon alang sa korona sa tinagakay nga duwa.
Ang makampiyon mobulsa og P300,000, samtang ang mopahiluna sa ikaduha ngadto sa ikaupat nga dapit makadawat og P200,000, P100,000 ug P50,000.