CEBU, Philippines — Duha ka bulan sukad sila nagbugno alang sa korona sa PBA Governors' Cup, ang TNT ug Barangay Ginebra magsungag na sab sa usa ka krusyal nga duwa karong adlawa (Biyernes, Enero 17) diin sila parehong naglaraw nga mopahayag sa ilang kampanya nga makaangkon og luna sa Top 2 nga dunay twice-to-beat advantage sa PBA Commissioner's Cup quarterfinals.
Mao kini ang misyon nga buot makab-ot sa duha ka mainit nga managkaribal sa ilang engkwentro nga gikatakda sa alas 7:30 sa gabii didto sa Philsports Arena sa Pasig City. Ang Tropang Giga mihaw-as gikan sa 94-87 nga pagpakaging sa NLEX Road Warriors niadtong Miyerkules nga nakainat sa nagkadena nilang daog ngadto sa lima ka duwa.
Samtang ang Gin Kings madasigon usab human gilampaso ang Blackwater Bossing, 86-63, sa miagi nilang pagtikang sa korte.
Sa kasamtangan, ang TNT nagkupot og 6-2 record, usa ka duwa lamang ang gintang nila sa Ginebra nga nagtangag og 6-3 nga baraha.
Gawas sa ilang tinguha sa quarterfinals, usa ka dumot nga pinaksitay ang seguradong moulbo tali sa TNT ug Ginebra nga maoy nag-ilog sa titulo sa pasiunang komperensiya diin si Rondae Hollis-Jefferson ug kauban ang mipatigbabaw sud sa unom ka duwa.
Ang TNT 2-0 na karon batok sa Ginebra gumikan kay ang Tropang Giga man sab maoy midaog sa miagi nilang pinaksitay sa kampiyonato sa 2023 Governors' Cup.