Lakers, Clippers  mibalik sa korte Mihatag og kalingawan taliwala sa katalagman

CEBU, Philippines — Ang Lakers ug ang Clippers mibalik sa korte uban ang pagsaludo sa mga nag-unang miresponde sa dakong sunog nga mi-igo sa Los Angeles ug hangtud karon padayon nga gikumbatihan sa mga kabomberohan.

Ang Lakers nahagba sa mga kamot sa San Antonio Spurs, 126-102, didto sa ilang Crypto.com Arena samtang ang Clippers mibuntog sa Miami Heat, 109-98, didto sa Intuit Dome sa Inglewood.

Managlahing man tuod ang kapalaran ang nahiaguman sa duha ka pambato sa LA apan ang labing mahinungdanon mao nga nakahatag sila og kalingawan taliwala sa makalisang nga katalagman nga mihampak sa ilang dapit.

"Sports are a lot of things and sports can certainly provide an escape and a distraction. Hopefully sports tonight can provide some joy as well," matud pa ni Lakers coach JJ Redick, kansang balay nga gisaw-an niya uban sa iyang asawa ug duha nila ka anak gihimong abo sa dakong kalayo nga miulbo didto sa Palisades sa miaging semana.

Mao sab ang sentimento ni Clippers coach Tyronn Lue.

"I hope it can bring some smiles to some faces," padayag pa ni Lue. "It's been tough the last four or five days. We're still supportive in every way we can be as an organization, as a staff, doing whatever we can. Once these games are over it's still back to real life."

Si Norman Powell maoy nangu sa Clippers uban ang 29 puntos.

Dako sab og naambag si Ivica Zubac nga mipupo og 21 puntos ug 20 ka rebounds ingon man si James Harden nga mibubo og 21 sa iyang 26 puntos sa second half aron pangulohan ang impresibong pagbalitok sa  Clippers.

"We're going through some tough times right now," dason pa ni Harden, nga mipasa sab og 11 ka assists. "Something we've never seen before. So it's very, very powerful for us to stand together... as one we can stand together and get through it."    Samtang midaog ang Clippers, ang Lakers nahagba sa ikatulong sunod-sunod nga higayon.

Sila si Victor Wembanyama, Stephon Castle ug Devin Vassell mikadlit og 23 puntos matag usa alang sa Spurs.

Si Anthony Davis mipatuasik og 30 puntos uban ang 13 ka rebounds samtang si LeBron James midugang og 18 puntos ug walo ka assists sa naparot nga Lakers.