CEBU, Philippines — Ang Gealon Racing Team ni Cebu City Councilor Atty. Rey Gealon misikad sa ilang kampanya ning bag-ong tuig pinaagi sa usa ka masipang buto.
Una sa tanan, ang mga pambato sa GRT miposte og impresibong 2-3 finish sa premirong 42K category sa AIA Cebu Marathon 2025 niadtong Domingo, Enero 12, didto sa SM Seaside City.
Si Mark Kevin Revilla mitapos sa ikaduhang dapit sa makutas nga full marathon nga distansiya uban ang oras nga 2:49:51 samtang ang teammate niyang si Andy Toniacao nalandig sa ikatulong puwesto sa oras nga 2:58:19.
Sa laing bahin, si Kelvin Boyles nakuha ang gihandum sa kadaghanan nga Sub-4 sa dihang gihuman niya ang karera sud lamang sa tulo ka oras ug 45 minutos.
Sila si Alkin Ando, Richard Celestial, Michael Vasaya, Limito Caraballe Jr., judge Hazel Caraballe, Chester Rago, Alex Cabando ug Jhonelle Tibay nakasugakod sab sa malisud nga hagit sa tagsa-tagsa nila ka mga kategoriya.
Didto sa Cadiz City, Negros Occidental, ang laing garbo sda GRT nga si Christian Miraflor gikoronahang kampiyon sa Dinagsa Festival Duathlon nga naglangkob og 5K run, 40K bike ug 3K run.