Thunder milampaso sa Knicks, kings mipakurat sa Celtics

CEBU, Philippines —  Sila si Shai Gilgeous-Alexander ug Isaiah Joe nagkumbinar og 70 puntos sa dihang gikulata sa Oklahoma City Thunder ang New York Knicks, 126-101, sa NBA kagahapon didto sa Madison Square Garden sa New York.

Impresibong pagbangon ang gihimo sa Thunder human sila gipilde sa Cleveland Cavaliers sa miagi nilang duwa nga nakapatuol sa franchise record nilang 15 ka sagunson nga daog.

Bangis kaayo ang Thunder gikan sa pagsugod hinungdan nga miposte kini og 31-17 nga labaw human sa unang kuwarter.

Padayong nanginit ang Thunder aron inaton ang ilang bentaha ngadto sa 27 puntos, 70-43, sa halftime. Wala na sila molingi pa sukad niadto.

Si Gilgeous-Alexander mikadlit og 39 puntos human nakapasud og 15 sa 21 niya ka itsa samtang si Joe milansang og walo ka 3-pointers sa iyang 31 puntos.

Human sa 25 puntos nilang demolisyon sa Knicks, ang Thunder mipahugot sa ilang pagkupot sa solong liderato sa Western Conference bitbit ang 31-5 nga baraha.

Sa laing duwa, ang Sacremento Kings mibihag sa defending champion Boston Celtics, 114-97.

Si DeMar DeRozan mitali og 24 puntos apan ang labing sipa nga pakpak adto napunta ni Domantas Sabonis nga mikolekta og 23 puntos ug 28 ka rebounds.

Dako sab og naambag sila si Malik Monk ug Keegan Murray nga nagkumboya'g 41 puntos alang sa Kings. Didto sa Orlando, si Giannis Antetokounmpo mibaraw sa pagbalik ni Paolo Banchero human nakapalta og 34 ka duwa tungod sa injury sa dihang mipatuasik siya og 41 puntos aron ituboy ang Milwaukee Bucks ngadto sa 109-106 nga pagpayaka sa Magic.

Si Antetokounmpo duna say 14 ka rebounds, upat ka assists, tulo ka steals ug duha ka blocks samtang si Damian Lillard mihatag og dakong suporta bitbit ang 29 puntos alang sa Bucks.

Didto sa Philadelphia, ang New Orleans Pelicans mipiog sa 76ers, 123-115, bisan og wala ang suspendido nilang bitoon nga si Zion Williamson.

Sa Indianapolis, gitiwasan sa Indiana Pacers ang prolema sa Golden State human gipakaging nila ang Warriors, 108-96.

Sa laing aksiyon, si Nikola Jokic mehistro dayon og triple-double sa iyang pagbalik human nakapalta og duha ka duwa kay nayayay aron pangulohan ang Denver Nuggets ngadto sa 124-105 nga paglampaso sa Brooklyn Nets.

Si Jokic miposte og 35 puntos, 12 ka rebounds ug 15 ka assists samtang si Russell Westbrook mipupo sab og triple-double uban ang 25 puntos, 11 ka rebounds ug 10 ka assists alanbg sa Nuggets nga mitikang sa ikaupat nga puwesto sa West bitbit ang 22-15 rekord.