CEBU, Philippines — Ang San Miguel Beermen ug Magnolia Hotshots magbangga sa usa ka krusyal nga duwa sa PBA Commissioner's Cup karong adlawa (Dominggo, Enero 12) didto sa Ynares Sports Center sa Antipolo City.
Kini tungod kay ang modaog sa ilang engkwentro nga gikatakda sa alas 7:30 sa gabii dako og puruhan nga makaangkon og luna sa quarterfinals.
Mao kini ang gitaradahan sa duha ka kampo.
Sa kasamtangan, ang Hotshots ug ang NLEX Road Warriors nagtabla sa ikasiyam nga puwesto bitbit ang managsamang 3-5 nga baraha.
Samtang ang Beermen anaa sa ikawalong dapit uban ang 3-4 nga marka.
Walo lamang ka teams ang moabante sa playoffs mao nang ang Beermen ug Hotshots tataw nga makigpatay aron makab-ot ang bililhon nga kadaogan.
"Either we win or we go home pretty much," matud pa ni Magnolia forward Zavi Lucero.
Ang Magnolia nakaipsot sa Terrafirma, 89-84, sa miagi nilang duwa, samtang ang San Miguel nasagunson og duha ka pilde ug wa pay daog sukad miabot ang bag-o nilang import nga si Jabari Narcis.