CEBU, Philippines — Apil ang pinuy-anan sa duha ka dekalibreng NBA coaches nga sila si Steve Kerr sa Golden State Warriors ug J.J. Redick sa Los Angeles Lakers sa liboan ka balay nga nangaugdaw atol sa dakong sunog nga miigo didto sa LA County sa California nga hangtud karon padayon pang gikumbatihan sa mga kabomberohan.
Matud pa ni Redick nga ang iyang pamilya napugos pagbakwit sa ilang balay didto sa Pacific Palisades nga maoy naigo og maayo sa trahedya nga mikalas na og 11 ka tawo.
Emosyonal kaayo si Redick sa ilang nadangatan dayong pahungaw sa gibati niyang kasubo.
"I'm not sure I've wept or wailed like that in several years. I was not prepared for what I saw," matud pa ni Redick kabahin sa iyang gibati human makita nga naabo na ang ilang balay sa iyang pabalik gikan sa ilang road game didto sa Dallas niadtong Huybes.
"It was complete devastation and destruction. I went a different way to the house through the village, and it's all gone. "I don't think you can ever prepare yourself for something like that," dugang pa ni Redick.
Tungod sa insidente, temporaryong kanselado ang lima ka duwa sa Lakers didto sa ilang korte nga magsugod unta batok sa Charlotte Hornets niadtong Biyernes. Gisibog sab ang ila untang duwa batok sa San Antonio Spurs karong adlawa.
Sa iyang bahin, si Steve Kerr magul-anong mipahibawo nga gipapha sab sa bangis nga kalayo ang balay nga iyang gipuy-an sa iyang pagkabata didto sa Palisades.
"The entire NBA family sends its thoughts and support to the community of Los Angeles during this challenging time," dason pa sa NBA sa usa ka opisyal nga pamahayag.
"We're grateful for the thousands of local firefighters and first responders who have demonstrated enormous bravery. Our prayers remain with those affected by the unimaginable devastation caused by the wildfires.