Cavs miwani sa Thunder sa  makasaysayanong sangka

CEBU, Philippines — Sa makasaysayanong sangka, si Jarrett Allen mi-iskor og 25 puntos aron pangulohan ang Cleveland Cavaliers ngadto sa 129-122 nga pagpahagba sa Oklahoma City Thunder sa NBA kagahapong adlawa didto sa Rocket Mortgage Fieldhouse sa Cleveland, Ohio.

Ang Cavs miinat sa labing nindot nga rekord ning season ngadto sa 32-4 human miposte sa ika-11 nilang sagunson nga daog.

Samtang ang Thunder natagak sa 30-6 human naputol ang franchise-record nilang 15 ka sunod-sunod nga daog.   

Sa gabii diin ang bitoon sa Cavs nga si Donovan Mitchell namugnaw ug nalimitahan ngadto sa 11 puntos kay mipasud lamang og tulo sa 16 niini ka ista, misalida ang mga big men sa Cleveland.

Si Allen midugang og 12 ka rebounds, unom ka assists ug tulo ka steals samtang si Evan Mobley miamot og 21 puntos, 10 ka rebounds ug pito ka assists.

Nahimo silang labing unang Cavaliers teammates nga mireshitro og 20 puntos, 10 ka rebounds ug lima ka assists matag usa sa usa ka duwa sukad nilang LeBron James ug Dwyane Wade niadtong 2017.

Sa kinatibuk-an, pito ka players sa Cleveland ang mikadlit og double figures apil na sila si Darius Garland, Max Strus ug Ty Jerome nga nagkumbinar og 50 puntos.

Mao pa lamang kini ang ikatulong higayon sa kasaysayan sa NBA diin nagbangga ang duha ka mga koponan nga gikan sa dili mominus 10 ka nagkadenang daogh.

Ikaduha pa lamang sab kini sa kasaysayan sa NBA diin nag-abot ang duha ka teams nga midaog og dili mominus 30 sa nag-una nilang 35 ka duwa sukad sa LA Lakers ug Milwaukee Bucks niadtong 1971-72 season.

Si Shai Gilgeous-Alexander maoy nangu sa Thunder uban ang 31 puntos samtang si Jalen Williams mihipos og 25 puntos sa pilderong kawsa.