Oftana gibayaw nga Player of the Week sa PBA

CEBU, Philippines — Si Calvin Oftana gibayaw nga PBA Player of the Week tungod sa maanindot niyang salida sa miaging mga duwa sa TNT Tropang Giga.

Ang tirador sa TNT milansang og  siyam ka 3-pointers sa career-high niyang 42 puntos atol sa 103-100 nilang kadaogan batok sa Magnolia Hotshots niadtong Miyerkules sa gabii.

Nakapabuhi kini sa dugo sa Tropang Giga nga napilde sa nag-una nilang duwa ka duwa sa PBA Commissioners' Cup.

Nasugod ang pagpanginit ni Oftana niadtong pang miaging semana diin siya mipasud og unom sa 10 niya ka tres ugaling lang kay gipilde sila sa NorthPort.

Ning higayona, nagmadaogon na si Oftanan ug ang TNT batok sa Magnolia.

Gumikan niini, ang Gilas Pilipinas pool member maoy gitunolan sa senenamang pasidungog sa PBA. Iyang gilupig sila si June Mar Fajardo sa San Miguel ug Joshua Munzon sa North Port.

“Ginagawa ko naman ‘yun araw-araw sa practice,” matud pa ni Oftana. “Confidence ‘yung binibigay ng coaches, si Coach Chot (Reyes) sa amin, to take those shots. ‘Yun ‘yung sinasabi niya. Kapag libre, tira. And giving credit lang din sa mga teammates ko.”

Mismo ang import nilang si Rondae Hollis-Jefferson ang misaludo ni Oftana sa gipakita niining katakos.

“Calvin had an amazing game. I’m always happy to see Calvin play well and see the smile in his face. We actually have the same birthday (January 3). It’s an amazing feeling,” dason pa ni Hollis-Jefferson.