Sila si Berland "The Triggerman" Robles ug Ian Paul "The Assassin" Abne sa ARQ Stable mibuntog sa Chinese nilang mga kontra aron pagsakmit og World Boxing Association (WBA) regional titles atol sa “Engkwentro 14” fight card sa ARQ Sports niadtong Sabado sa gabii, Disiembre 14, didto sa Bulacao Sports and Activity Center sa dakbayan sa Talisay.
Ang 24-anyos nga si Robles mipatigbabaw batok ni Chenghao Luo pinaagi sa majority decision aron paglugwa nga WBA Asia South flyweight champion.
Human sa 10 ka hugna nga aksiyon, duha ka judges ang mi-iskor og 96-94 ug 97-93 samtang ang ikatulo mitabla sa away, 95-95, hinungdan sa majority decision alang ni Robles, nga miinat sa perpekto niyang marka ngadto sa 11-0 uban ang 4KOs. Si Luo natagak sa 7-2-1 uban ang 4KOs. Sa supporting main event, si Ian Abne miposte og impresibong kadaogan pinaagi sa unanimous decision batok ni Jin Ping Yang aron langkaton ang WBA Asia South minimumweight belt.
Ang tulo ka mga judges mitali og 100-90, 99-91 ug 98-92 pabor tanan ni Ian Abne, nga nagpabiling way pilde uban ang 12-0-1 rekord nga gidayayan-dayanan og 4KOs. Si Yang nahagsa sa 5-5-1 uban ang 1KO.
Nagmalampuson sab ang lain pang tulo ka mga pambato sa ARQ nga gikalipay sa ilang big boss nga si Jason Arquisola.
Ang kasamtangang World Boxing Federation (WBF) Australasian welterweight champion nga si Rodel "The Hulk" Wenceslao mipukan ni Ryan Sermona sa Negros Occidental pinaagi sa 4th round TKO.
Giundang ang away tungod sa tambag ni ringside physician Dr. Jose Unabia kay si Sermona dili na makapadayon tungod kay nakahiagum og dako kaayong gisi sa wala niyang nawong.
Si Wenceslao nagtangag na karon og 22-19-2 nga baraha uban ang 10KOs.
Sa laing bahin, sila si April Jay "Astroboy" Abne ug Angelus "Pitbull" Pilapil parehong midaog pinaagi sa unanimous decision batok niang Anferne Palarca sa Bohol ug Mohaleden Kalibo sa North Cotabato.
Si April Abne aduna nay 15-1 rekord uban ang 6KOs, samtang si Angelus mibitad sa mainit niyang ratsada ngadto sa 4-0 uban ang 2KOs.
Si Giannis Antetokounmpo sa Milwaukee Bucks milusot batok sa Atlanta Hawks atol sa ilang duwa sa NBA Cup semifinals kagahapon didto sa T-Mobile Arena sa Las Vegas, Nevada.