Title fight ni "Monster" Inoue gisibog

CEBU, Philippines — Ang super bantamweight world title fight sa gikaintapang Japanese "Monster" nga si Naoya Inoue batok ni Sam Goodman didto Tokyo karon untang bisperas sa Pasko gisibog ngadto na sa Enero 24.

Kini human ang Australyanong challenger nakahiagum og angol sa iyang mata atol sa usa ka sparring.

Nayayay ang mata ni Goodman sa pinal niyang training session sa dili pa siya molarga sa Japan aron sangkaon ang undisputed champion. Si Goodman, nga maoy mandatory challenger sa duha ka mga korona ni Inoue sa WBO ug IBF, nanginahanglan og upat ka tahi aron masira ang gisi sa iyang mata.

Tungod niini, dili siya puydeng mo-away sud sa upat ka semana.

Si Inoue, nga nagkupot og perpektong 28-0 rekord uban ang 25KOs, mipilde ni TJ Doheny sa Ireland sa labing uwahi niyang depensa didto sa Tokyo niadtong Septiembre. Wala pa say pilde si Goodman nga nagtangag og 19-0 nga baraha uban ang 8Kos.