CEPCA "Battle of Champions" kumbatihan na karong adlawa
CEBU, Philippines — Ang panapos sa tuig nga torneyo sa Cebu Executives and Professionals Chess Association nga giulohan og "Battle of Champions" ipahigayon na karong adlawa (Dominggo, Disiembre 15) didto sa balay ni CEPCA President Engr. Jerry Maratas sa Royale Cebu Estates sa Barangay Casili, Consolacion.
Magasugod ang pinug-anay sa utok sa alas-2 sa hapon.
Sila si National Masters Arnolito Cadiz ug Rogelio Enriquez Jr. ug Arena International Master Venancio Loyola maoy nag-una sa listahan sa lig-ong mga entrante sa Class A.
Nagtirada sab sa titulo sila si Antonio Cabibil, Olea Amado Jr., Reynaldo Flores, Rosendo Yamyamin, Samuel Tenio, Peterson Sia, Toledo-Xignex Trojans team administrator Felix Poloyapoy Jr., Michael Tinga, ug Carlo Maraat, nga lab-as pang nakapasar sa September 2024 Bar exams.
Makigduyog kanila ang pipila ka mga wild cards nga naglangkob nilang kanhi CEPCA president Jojo Muralla ug ASEAN Age-Group gold medalist Apple Rubin.
Sa Class B, mag-ilog sa korona sila si Edwin Cablao, Richard Ouano, Stephen Rosales, Leo Cortez, Rafael Perez, Manuel Abucay, Mario Bustillo Sr., Gabriel Misterio, Serojano Silveno, Roberto Calapan, ug Ruel Hortelano.
Si Maratas mopakita'g aksiyon isip wild card kauban sila si Vince de la Torre ug Dave Menoria.
Ang makampiyon sa Class A ug Class B parehong mobulsa og P5,000, samtang ang mopahiluna sa ikaduha ug ikatulong dapit makadawat og P3,000 ug P2,000.
- Latest
