SK Intermurals: Bulacao, Cebu City mipahigayon og sportsfest sa unang higayon
CEBU, Philippines — Nagmabungahon ang pag-arangkada sa labing unang SK Intermurals sa Barangay Bulacao, dakbayan sa Sugbo ning bag-ohay pa lamang.
Sa pagpaghigayon ning kalihukan, si Bulacao Brgy. Capt. Junah Babatuan-Abellanosa nagkanayon mga mahinungdanon kaayo alang sa mga kabatan-on ang pag-apil ning paugnat sa kusog kay usa kini ka epektibong pamaagi aron sila mahilayo sa mga dautang bisyo sama sa droga.
Dugang niini, ang aktibo nilang partisipasyon makatabang pagpanday sa usa ka mas nindot ug mas lig-on nga Bulacao.
Si Abellanosa mipadayag sa mainiton niyang pasalamat ngadto sa SK Council ubos sa pagpangu ni Junbert Bacalso sa ilang paningkamot pag-organisa ning dalaygong aktibidad.
"Together, we can foster a healthier and more united community with this great sportsfest, a first of its kind," dason pa ni Abellanosa.
Sa iyang bahin, si Bacalso mipaambit nga ang pagpasiugda nila ning maong kompetisyon kabahin sa ilang tinguha nga suportahan ang panginahanglan sa mga kabatan-onan sa ilang dapit.
"Rest assured that we will continue to provide better projects and activities aimed at benefiting the young people of Bulacao," matud pa ni Bacalso. "With unity and hard work, we will ensure a brighter future for the youth of our community".
Ang ubang mga miymebro sa Bulacao SK Council mao sila si Jamaica Abellanosa, Janel Baculi, Jame Ronel Abellana, Genesis Campo, Margo Mahusay, Mayette Maluntad ug Mary Fritzie Llagas uban nilang Miles Casio (secretary) ug Gerey Dacalos (treasurer).
Inabagan sa OBRA Events & Productions ni Macy Gaviola, ang Bulacao sportsfest naglangkob og basketball, volleyball (regular ug dayon-dayon), badminton, billiards, scrabble ug chess.
Sa laing bahin, si Creshia Cereño sa Sitio San Roque maoy gikoronahang Miss SK Bulacao Intermurals 2024. Sila si Jasia Durog sa Sitio Lower San Roque ug Jianshe Dellera sa Sitio Peace Valley Homes ang gibayaw nga first ug second runner-up.
- Latest
