Embiid nayayay na sab

CEBU, Philippines — Wala makatiwas og duwa si Joel Embiid kay nakahiagum na sab og angol atol sa 121-107 nga kapildihan sa Philadelphia 76ers sa mga kamot sa Indiana Pacers sa NBA kagahapong adlawa didto sa Wells Fargo Center sa Philadelphia, Pennsylvania.

Si Embiid, nga nakadaog og gold medal uban sa Team USA didto sa Paris ning tuig, nakig-away alang sa rebound ubos sa goal sa Indiana sa dihang wala tuyoa nga nasikhan ang iyang nawong ni Bennedict Mathurin sa Pacers.

Si Embiid mi-iskor og 12 puntos uban ang upat ka rebounds ug lima ka assists sa wala pa mobiya sa naghinapos nga bahin sa first half.

Matud pa sa Sixers nga nabuak ang sinus ni Embiid ug ipaubos kini sa dugang medikal nga eksaminasyon aron masota ang iyang kahimtang.

Daw sa natiwasan gyud ang sitwasyon ni Embiid nga nakaduwa sa ikaduha pa lamang nga higayon sa iyang pagbalik human nakapalta og pito ka duwa.

Sa kinatibuk-an ning season, nakaduwa siya unom pa lamang ka higayon tungod kay gihamok sa depektoso niyang tuhod gawas nga nasuspenso og tulo ka duwa human nakabangi ang usa ka tigbalita.

Kay wala si Embiid, si Tyrese Maxey mibirada og 22 puntos apan dili kini igo alang sa Sixers.

Sa habig sa Pacers, si Tyrese Haliburton ang bida bitbit ang 32 puntos ug 11 ka assists inabagan nilang Pascal Siakam ug Obi Toppin nga nagkumboya'g 43 puntos.