CEBU, Philippines — Ang Khalifa Cup:National Basketball Training Center (NBTC) Cebu Local Qualifying Tournament mo-arangkada na karong adlawa (Sabado, Disiembre 14) didto sa Recoletos Coliseum sa University of San Jose-Recoletos (USJ-R) Basak Campus.
Sa pasiunang aksiyon sa alas 7:30 sa buntag, ang University of San Jose-Recoletos (USJ-R) Baby Jaguars makigtige sa Abellana National School (ANS) Chiefs.
Ang University of Southern Philippines Foundation (USPF) Baby Panthers mohamag sa Don Celestino Martinez Sr. Taytayan Integrated School (DCMTIS) sa Bogo City sa ikaduhang duwa sa alas-9 sa buntag, samtang ang ANS Chiefs makigbugno sa San Roque College de Cebu (srcC) Hounds sa alas 10:30 sa buntag.
Ang DCMTIS mobalik sa korte aron engkwentrohon ang University of San Carlos (USC) Baby Warriors sa alas-2 sa haponm samtang ang srcC Hounds makigharong sa USJ-R Baby Jaguars sa alas 3:30 sa hapon.
Sa katapusang sangka, ang USC Baby Warriors mosakbang sa USPF Baby Panthers sa alas-5 sa hapon.
Ang Top 2 matag bracket moabante sa crossover semifinals sugod sa alas-8 sa buntag karong Domingo, Disyembre 15. Ang mga mananaog mag-abot sa kampiyonato sa alas-2 sa hapon.
Si NBTC Cebu LQT commissioner Atty. Francis Tolibas nagkanayon nga ang kampiyon ug first runner-up makadawat og P150,000 nga ayuda matag usa sa dihang mokumbati sila sa NBTC Visayas Regional Championship 2025 unya sa Pebrero 12-16 didto sa Bacolod Tay Tung High School gym sa Bacolod City.