Bisa'g wala si Tatum, Celtics mikastigo sa Pistons

CEBU, Philippines — Way Jason Tatum, way problema alang sa defending champion Boston Celtics.

Salamat ni Payton Pritchard nga mipabuto og 27 puntos ug mipasa og 10 ka assists aron pangulohan ang Celtics ngadto sa 123-99 nga paglampornas sa Detroit Pistons sa NBA kagahapong adlawa didto sa TD Garden sa Boston, Massachusetts.

Si Pritchard naka-igo og pito ka 3-pointers ug nakaabot na og 500 ka tres sa iyang karera. Siya maoy ika-10 nga player sa kasaysayan sa Celtics nga nakakulit sa maong marka.

Mangtas kaayo ang Celtics nga mibomba og 20 ka tres hinungdan nga ilang natapakan ang haw-ang sa temporaryong gibiyaan ni Tatum nga wala makaduwa tungod kay nayayay ang tuong tuhod. Si Derrick White milansang sab og pito ka tres dayon na ngadto sa pagtapos uban ang 23 puntos.

Si Kristaps Porzingis mi-iskor og 19 samtang si Jaylen Brown midugang og 14 puntos alang sa Celtics nga miparot sa Pistons sa ika-15 nga sagunson nga higayon.

Way sipyat si Luke Kornet sa lima niya ka itsa aron pagdonar og 12 puntos alang sa Celtics, nga dali nga nakabawi gikan sa miagi nilang kapildihan sa mga kamot sa Memphis Grizzlies.

Ang Celtics nagkupot na karon og 20-5 nga baraha, usa ka duwa lamang ang ligas nila sa 21-4 nga Cleveland Cavaliers.