Si Joel Embiid mihimo dayong og kasikas sa iyang pagbalik human nakapalta og pito ka duwa.
Kini human ang mangtas nga Cameroonian center mipabuhagay og 31 puntos ug milangkat og 12 ka rebounds aron pangulohan ang Philadelphia 76ers ngadto sa 108-100 nga pag-ihaw sa Chicago Bulls sa NBA kagahapon didto sa United Center sa Chicago, Illinois.
Wala makaduwa si Embiid tungod sa na-angol nga wala niyang tungod inubanan og personal nga rason sukad sila gipayaka sa Memphis Grizzlies niadtong Nobiembre 20.
Samtang wala si Embiid, ang Sixers miposte og 4-3 nga baraha.
Sa pagtikang niya og balik sa korte, ang 30-anyos nga si Embiid mikulit sab og upat ka assists ug duha ka blocks sa ikalima pa lamang niyang duwa ning season.
Mikuha sab og atensiyon si Tyrese Maxey nga mirehistro sa labing unang triple-double sa iyang karera bitbit ang 25 puntos, 14 ka assists ug 11 ka rebounds.
Si Zach LaVine ang nangu sa pilderong Bulls uban ang 30 puntos.
Didto sa New York, si Giannis Antetokounmpo miharos og 34 puntos ug 11 ka rebounds aron ituboy ang Milwaukee Bucks ngadto sa 118-113 nga pagpakaging sa Brooklyn Nets.
Si Damian Lillard midugang og 15 puntos ug 11 ka asssists samtang sila si Bobby Portis ug Gary Trent Jr. nagkumboya'g 43 puntos alang sa Bucks.
Mipabuto si Dennis Schroder og 34 puntos apan nakawang ang iyang paningkamot alang sa Nets.