Jokic padayong nagmangtas apan daog na ning higayona
CEBU, Philippines — Si Nikola Jokic mipaulbo og 48 puntos sa dihang gibalian og pako sa Denver Nuggets ang Atlanta Hawks, 141-111, sa NBA kagahapon didto sa State Farm Arena sa Atlanta, Georgia.
Wala na makawang ang impresibong salida ni Jokic ning higayona gumikan kay nahagba man sila sa mga kamot sa Washington Wizards niadtong Dominggo bisan og mipabuto siya og career-high 56 puntos.
Bangis kaayo si Jokic nga mibira sab og 14 ka rebounds, walo ka assists ug tulo ka steals.
Si Michael Porter Jr. midugang og 26 puntos samtang sila si Christian Braun ug Julian Strawther nagkumpoya'g 30 puntos alang sa Nuggets, nga nagkupot na og 12-10 nga baraha samtang gipakgang sa unom ka sagunson nga daog sa Hawks.
Sa laing bahin, si Tyler Herro mikadlit og 34 puntos sa dihang gipatilaw sa Miami Heat ang Cleveland Cavaliers sa ikaupat pa lamang niining pilde ning season, 122-113.
Sa ubang mga resulta, si Stephen Curry mipupo og 30 puntos ug walo ka assists sa dihang gipaluhod sa Golden State Warriors ang Minnesota Timberwolves, 114-106, samtang sila si Anthony Davis, D'Angelo Russell ug Rui Hachimura nagkumbinar og 81 puntos aron aswaton ang Los Angeles Lakers ngadto sa 107-98 nga pagpayaka sa Portland Trail Blazers.
- Latest
