LOS ANGELES — Humakot si Anthony Davis ng 30 points at 11 rebounds para banderahan ang Lakers sa 107-98 panalo sa Portland Trail Blazers kahit wala si LeBron James.
Naglista si D’Angelo Russell ng 28 points at 14 assists para sa pagpigil ng Los Angeles (13-11) sa kanilang three-game losing skid.
Ito ang unang pagkakataon na hindi naglaro si James ngayong season dahil sa isang left foot contusion.
Kumamada si James ng mga averages na 23.0 points with 9.1 assists at 8.0 rebounds.
Umiskor si Rui Hachimura ng 23 points para sa home team.
Pinamunuan ni Deandre Ayton ang Portland (8-16) sa kanyang 14 points at 19 rebounds, habang may 19 markers si Shaedon Sharpe.
Sa San Francisco, umiskor si Stephen Curry ng 30 points para igiya ang Golden State Warriors (14-9) sa 114-106 pagdaig sa Minnesota Timberwolves (12-11).
Sa California, nagpasaiklab si Fil-Am Jalen Green ng 31 points at may 22 markers si Amen Thompson sa 117-106 pagpapatumba ng Houston Rockets (16-8) sa Clippers (14-11).
Sa Washington, nagposte si Jaren Jackson Jr. ng 21 points at kumolekta si Scotty Pippen Jr. ng 14 points at 12 assists sa 140-112 pagtambak ng Memphis Grizzlies (17-8) sa Wizards (3-19).
Sa San Antonio, kumabig si Victor Wembanyama ng 25 points para sa 121-116 paglusot ng Spurs (12-12) sa New Orleans Pelicans (5-20).