CEBU, Philippines — Ang GlobalDev Batang Opon maoy milugwa nga kampiyon sa Lapu-Lapu City Christmas League For A Cause Commercial Basketball Tournament.
Gipakaging sa GlobalDev ang CM Farm, 92-82, sa ilang knockout final match aron angkonon ang P200,000 nga ganting salapi ning unom nga adlaw nga torneyo niadtong Biyernes sa gabii, Disiembre 6, didto sa Hoops Dome sa Barangay Gun-ob.
Si Rheinhard Jumamoy maoy nangu sa GlobalDev ngadto sa gihandum nilang titulo hinungdan sa pagbayaw kaniyang
Finals MVP.
Ang bitoon sa National University (NU) Bulldogs sa UAAP nga si Jumamoy naglangkob sab sa Mythical 5 kauban silang Steve Nash Enriquez, Kint Ariar, Tansiong Bonganciso, ug William Mcaloney
Si Genmar Bragais maoy mibira sa Conference MVP award. Ang team niyang CM Farm mibulsa og P100,000 sa pagtapos nila isip first runner-up.
Sila si Lapu-Lapu City Mayor Junard “Ahong” Chan ug Congresswoman Cindi King-Chan maoy nangu sa awarding ceremony kauban ang mga sakop sa konseho sa dakbayan, ABC President ug Basak Barangay Captain Jasmine Marie Chan, SK Federation President Orlan Joseph Chan-Carungay, ug Lapu-Lapu City Sports Commissioner Vince Chan-Carungay.