CEBU, Philippines — Upat ka teams ang magtinagakay alang sa ikatulong dapit sa tagsa-tagsa nila ka dibisyon sa Cebu Schools Athletic Foundation, Inc. (CESAFI) Season 24 basketball tournament karong adlawa (Martes, Disiembre 3) diha sa Cebu Coliseum.
Sa collegiate level, ang University of San Jose-Recoletos (USJ-R) Jaguars ug ang Benedicto College (BC) Cheetahs mag-ilog sa bronseng medalya sa alas 7:30 sa gabii.
Ang Cheetahs, nga mihimo og makasaysayanong pagsud sa Final Four sa ikaduha pa lamang nila nga tuig sa liga, naglaraw nga utrohon ang 70-63 nilang pagpakaging sa Jaguars niadtong Nobiembre 12.
Sa high school category, ang University of the Visayas (UV) Baby Lancers ug ang University of Cebu (UC) Baby Webmasters magbugno alang sa ikatulong puwesto sa alas-6 sa gabii.
Ang Baby Lancers milampaso sa Baby Webmasters, 75-50, sa miagi nilang engkwentro niadtong Oktubre 19.