Nuggets milampaso sa Lakers

CEBU, Philippines — Si Nikola Jokic miharos og 34 puntos, 13 ka rebounds ug walo ka assists aron pangulohan ang Denver Nuggets ngadto sa 127-102 nga paglampornas sa Los Angeles Lakers, 127-102, sa NBA kagahapon didto sa Crypto.com sa LA, Calirornia.

Tungod niini, ang Nuggets miinat sa ilang dominasyon sa Lakers nga ilang gipilde sud sa 13 ka higayon sa miagi nilang 14 ka duwa apil na ang pagtagak sa Lakers sa playoffs sa miaging duha ka seasons.

Miamot si Michael Porter Jr. og 24 puntos ug 11 ka rebounds, si Jamal Murray mi-iskor og 14 samtang si Russell Westbrook midugang og 14 puntos 11 ka assists alang sa Nuggets nga mikulata sa Lakers sa second half, 70-39, aron hatagan si coach Michael Malone sa team-record nga ika-443 niining daog uban sa Nuggets.

Ang Nuggets nagkupot na karon og 9-6 nga baraha samtang ang Lakers natagak sa 10-6.

Si Austin Reaves maoy nangu sa Lakers bitbit ang 19 puntos. Si LeBron James mihipos og 18 puntos samtang si Anthony Davis dunay 14 puntos ug 10 ka rebounds sa pilderong kawsa.

Didto sa Milwaukee, sila si Giannis Antetokounmpo ug Damian Lillard nagkumboya'g 63 puntos sa dihang gibugha sa Bucks ang Charlotte Hornets 125-119, alang sa ikaupat nilang sagunson nga daog.

Ang Bucks misaka sa ilang rekord ngadto sa 8-9 bisan pa og si Hornets guard LaMelo Ball mipabuto og career-high 50 puntos ug 10 ka assists.

Si Antetokounmpo midugang og 11 ka rebounds ug unom ka assists alang sa Bucks.

Sa laing bahin, si Victor Wembanyama mikolekta og 25 puntos, pito ka rebounds ug siyam ka assists aron ituboy ang San Antonio Spurs ngadto sa 104-94 nga pagpakaging sa Golden State Warriors.

    Ang host Spurs nakapasol sab og 22 puntos gikan ni Harrison Barnes, 19 gikan ni Stephon Castle ug nuybe puntos ug pito ka assists gikan sa beterano nilang All-Star guard nga si Chris Paul.