UV Lancers mipahayag sa top 2 nilang misyon

CEBU, Philippines — Ang two-time defending champion University of the Visayas (UV) Green Lancers mipayaka sa University of Southern Philippines Foundation (USPF) Panthers, 70-61, aron palig-onon ang ilang misyon nga masud sa Top 2 nga dunay twice-to-beat advantage sa Final Four sa Cebu Schools Athletic Foundation, Inc. (CESAFI) Season 24 men's basketball tournament niadtong Domingo, Nobiyembre 17, didto sa Cebu Coliseum.

Si Raul Gentallan maoy bugtong UV player nga mikadlit og double figures uban ang 14 puntos, pito ka rebounds, tulo ka assists, tulo ka steals ug duha ka blocks sa dihang ang Lancers mihuman sa ilang kampanya sa eliminasyon bitbit ang 7-1 win-loss record. Usa ka duwa lamang ang ilang gintang sa 7-0 nga University of Cebu (UC) Webmasters.

Ang nag-unang duha ka qualifiers sa college division determinahon pa hinoon gumikan kay apil pa sa karera ang Benedicto College (BC) Cheetahs nga nagkupot og 5-1 nga baraha.   

Ang Cheetahs puyde pang moangkon sa numero unong luna kon ugaling modaog sila sa katapusan nilang duha ka duwa batok sa Webmasters ug  Cebu Institute of Technology-University (CIT-U) Wildcats.

Sa high school level, si Christophelcian Abellana nangu sa balanseng ataki uban ang 21 puntos sa dihang gi-ihaw sa UV Baby Lancers ang BC Baby Cheetahs, 125-67, aron pagbira og luna sa semifinals bitbit ang 8-2 nga marka, samtang ang Cebu Eastern College (CEC) Dragons milampaso sa USPF Baby Panthers,  58-35, aron pahayagan ang ilang tsansa sa semis.Nagtabla sa baraha nga 7-3, ang CEC Dragons ug UC Baby Webmasters mag-abot sa usa ka tinagakay nga duwa alang sa ikaupat ug katapusang luna sa semis karong Nobiyembre 26.

Sa laing bahin, sila si Kent Noguerra ug Jances Emmanuel Anacta nagkumbinar og 30 puntos, siyam ka rebounds, pito ka steals ug tulo ka blocks sa dihang nang CIT-U Baby Wildcats milampaso sa Don Bosco Technical College (DBTC)-Cebu Greywolves, 79-42, aron pagpanamilit uban ang 7-4 rekord, nga maoy labing nindot nilang salida sa 24 ka tuig nga kasaysayan sa liga.