Caitom mapasigarbuhon sa maanindot niyang kasinatian sa WBO Convention

CEBU, Philippines — Ang Sugbuanong boxing referee ug judge nga si Rey Caitom, Jr. gibati og tumang garbo ug kalipay sa maanindot niyang kasinatian pagrtambong sa World Boxing Organization (WBO) Convention sa labing unang higayon didto sa San Juan, Puerto Rico ning bag-ohay pa lamang.

Ang kanhi kampiyon nga boksingero nga karon reperi na mikuot sa kaugalingon niyang bulsa aron lamang mapalawman ang iyang kaalam atol sa ika-37 nga edisyon sa tinuig nga panagtigum sa mga dakong opisyal sa boksing sa tibuok kalibutan.

Sulit hinoon ang tanan alang ni Caitom.

Sa wala pa siya moadto sa pamosong isla sa Carribean, si Caitom mihunong usa sa Los Angeles, California diin siya nahiusa og balik sa kanhi niya mga ALA stablemates nga sila si Rodel Mayol, Jason Pagara ug Mark Magsayo. 

Nakulokabildo sab niya didto ang mga kababayan niyang sila si Romero Duno ug James Bacon, kanhi nga kampiyon nga toa na nakabase sa Amerika. Uban ni Mayol, gibira ni Caitom ang bulawanong oportunidad nga makabisita sa nabatog nga Wild Card Gym didto sa Hollywood diin iyang nahimimat si legendary trainer Freddie Roach sa unang higayon ingon man si Victor Ortiz, nga kanhi naghari sa WBC welterweight division.

Didto sa WBO convention, sangko sa langit ang pagmaya ni Caitom sa dihang nakita ang mga notadong reperi nga sila si Kenny Bayless ug Daniel Sandoval, mga presidente sa tanang upat ka dagkong organisasyon sa boksing, pipila ka bangiitang mga boksidor sama nilang Terence Crawford, Marco Antonio Barrera ug Juan Manuel Lopez, ug ang kauban niyang mga Pinoy ring officials lakip na si WBO Vice President for Asia Pacific Leon Panoncillo.

Ang labing mahinungdanon sa tanan, nakab-ot ni Caitom ang nag-una niyang misyon nga mao ang pagtambong sa WBO Referee and Judges Seminar diin napalapdan niya ang iyang kahibalo sa mga bag-ong lagda sa boksing ug pamaagi sa pag-iskor.

Mikuha sab siya og eksaminasyon sa Association of Boxing Commissions (ABC) sa tinguha nga mamahimong usa ka international boxing official.

"Nindot kaayo ang akoa na-experience sa WBO convention. Na-meet nako ang sikat nga mga personalidad sa boxing nga sa una kutob ra sa TV nako makita. Daghan kaayo ko og nakat-onan ug dili gyud nako malimtan ang tanan," paambit pa ni Caitom.