CEBU, Philippines — Si Victor Wembanyama nahimong ikaupat sa labing batan-on nga player nga naka-iskor og 50 puntos sa usa ka duwa sa NBA sa dihang ang 20-anyos nga Frenchman nangu sa San Antonio Spurs ngadto sa 139-130 nga pagpakaging sa Washington Wizards kagahapon didto sa Frost Bank Center sa San Antonio, Texas.
Ang No.1 pick sa 2024 NBA Draft mipabuto og 50 puntos sud lamang sa 26 minutos. Mipasud siya og 18 sa 29 niya ka itsa apil na ang walo ka 3-pointers nga career-high sab niya.
Mao kadto ang ikatulong sagunson nga duwa diin si Wembanyama milansang og dili mominus unom ka tres.
Gawas ni Wembanyama, ang laing players nga nakabugha og 50 puntos sa dihang nag-edad pa lamang sila og 20 anyos mao sila si Brandon Jennings, LeBron James ug Devin Booker.
Dili lamang si Wembanyama hinoon ang nakakulit og 50 puntos kagahapon.
Si Giannis Antetokounmpo mipaulbo og 59 puntos sa dihang ang Milwaukee Bucks mipiog sa Detroit Pistons, 127-120, sa overtime.
Ang nabantog nga "Greek Freak" naka-igo og 21 sa 34 niya ka mga tira ug milangkat sab og 14 ka rebounds ug pito ka assists sa labing nindot nga performance sa usa ka player ning season.
Sa laing bahin, ang way pildeng Cleveland Cavaliers miinat sa perpekto nilang rekord ngadto sa 13-0 human gipayaka ang Philadelphia 76ers, 114-106.
Tungod niini, ang Cavs nahimong ikaunom pa lamang nga team sa kasayayan sa NBA nga midaog sa nag-una nilang 13 ka duwa ug una sukad sa Golden State Warriors niadtong 2015-16 season.
Si Darius Garland maoy nangu sa Cleveland uban ang 25 puntos inabagan ni Donovan Mitchell nga miharos og 23 puntos, 13 ka rebounds ug siyam ka assists.