CEBU, Philippines — Si Stephen Curry miharos og 37 puntos sa dihang gibaraw sa Golden State Warriors ang pagbalik ni Klay Thompson didto sa Golden State uban ang 120-117 nga kadaogan batok sa Dallas Mavericks pagsugod sa NBA Cup kagahapong adlawa.
Ang nabantog nga "Splash Brother" ni Curry nga si Thompson sakop sa Warriors nga nakasakmit og upat ka kampiyonato sa NBA apan niadtong Hulyo nanamlit sa Golden State aron motapon sa Dallas.
Bisan og anaa na siya sa laing koponan, Aag 34-anyos nga si Thompson gidalitan gihapon og mainit nga pagdawat sa mga fans sa Warriors atol sa iyang pag-abot sa Chase Center.
Misalida sab dayon si Thompson pinaagi sa pagposa og unom ka 3-pointers sa iyang 22 puntos.
Apan napuhalan siya sa kanhi niya teammate nga si Curry.
Naglabaw unta ang Mavs og sayes puntos, 114-108, sa pinal nga tres minutos sa aksiyon, apan si Curry mirapido og 10 ka sagunson nga puntos aron aswaton ang Warriors ngadto sa impresibong kadaogan.
Sa laing bahin, si Joel Embiid mipupo og 13 puntos, lima ka assists ug tulo ka rebounds sa una niyang duwa ning season apan nabaraw ang iyang pagbalik sa korte human ang Philadelphia 76ers gipaluhod sa New York Knicks, 111-99.
Sa ubang mga resulta, gibihag sa Atlanta Hawks ang defending champion Boston Celtics, 117-116, bisan og wala ang alas nilang si Trae Young, ang Phoenix Suns mipaluhod sa Utah Jazz, 120-112, samtang ang Milwaukee Bucks misungag sa Toronto Raptors, 99-85.