CEBU, Philippines — Si International Master Kim Steven Yap maoy nanghawod sa Cebu Executives and Professionals Chess Association (CEPCA) 34th Anniversary Tournament:5th Engr. Boy “Chessmoso” Pestaño Memorial Chess Cup niadtong Domingo, Nobiyembre 10, didto sa Robinsons Galleria Cebu.
Gipilde ni Yap si Arena IM Dennis Navales sa ikasiyam ug katapusang hugna ug mao lamang kini ang iyang gikinahanglan aron sakmiton ang titulo uban ang kinatas-ang iskor nga 8.5 puntos.
Si Yap, sakop sa Toledo-Xignex Trojans nga bag-ohay pang mikulit og kasaysayan sa Professional Chess Association of the Philippines human gilangkat ang korona sa South Division sa PCAP Season 4 SGM Wesley So Cup bitbit ang perpektong 24-0 rekord, mibulsa og P15,000 sa iyang paningkamot. Nadungagan og P5,000 ang ganti ni Yap tungod kay ang pamilya ni anhing Engr. Francisco "Boy" Pestaño nga maoy nagtukod sa CEPCA niadtong 1990 midonar man og dugang P20,000 nga premyo alang sa nag-unang mga mananog.
Ang kampiyon sa miaging tuig nga si IM Joel Pimentel, Jr. ug si Arena Grandmaster Venancio Loyola, Jr. parehong mitapos uban ang 8.0 puntos apan si Pimentel ang mipahiluna sa ikadunang dapit tungod sa mas taas niyang tiebreaker. Mikadawat siya og P10,000, samtang si Loyola mikubra og P7,000 sa paglandig niini sa ikatulong dapit.
Si Ariel Joseph Abellana nagsolo sa ikaupat nga puwesto uban ang 7.5 puntos.
Naglangkob sa Top 14 mao sila si National Master Rommel Ganzon, Allan Pason, Bonn Rainauld Tibod, John Dave Lavandero, Arje Villarin, AIM Dennis Navales, Rosendo Yamyamin, Joel Pacuribot, Ralph Greval, ug Allerito Somosot, Sr. bitbit ang 7.0 puntos matag usa.
Nagkumpleto sa Top 20 ning usa ka adlaw nga torneyo nga gipaluyohan sa Celjem Construction and Development Corporation, JEMAR Engineering Services, ARQ Sports, ug Gonzalodo Enterprises mao sila si Chris Aldritz Pondoyo, Michael Pinar, Marquis Angelo Mallorca, Felix Poloyapoy Jr., Ruel Hortelano, ug Shane Kimberly Cabagnot uban ang 6.5 puntos matag usa.
Sa laing bahin, ang top performers sa tagsa-tagsa nila ka mga kategoriya mao sila si AGM Venancio Loyola Jr. (Cepcan A), Ruel Hortelano (Cepcan B), Shane Kimberly Cabagnot (female), Allerito Somosot Sr. (seniors), Theon Cade Miranda (Under 8), ug Marquis Angelo Mallorca (Under 14).