CEPCA 34th anniversary tourney
CEBU, Philippines — Mga hait nga chess players sa Sugbo magbangga karon
Ang pipila sa labing hait nga mga chess players sa Sugbo magtakos sa ilang abilidad sa gikahinaman nga 34th Anniversary Tournament sa Cebu Executives and Professionals Chess Association (CEPCA) nga giulohan og 5th Engr. Boy "Chessmoso" Pestaño Memorial Cup karong adlawa (Dominggo, Nobiembre 10) diha sa Cebu Chess Club nga anaa mahimutang sa 4th level sa Robinsons Galleria Cebu duol sa cinema area.
Magsugod ang kompetisyon sa alas-10 sa buntag. Human sa paniudto, usa ka mubo nga seremonyas sa pagbukas ang ipahigayon sa ala-1 sa hapon nga pagatambongan ni Cebu City Councilor Atty. Rey Gealon ug mga opisyal sa CEPCA nga gipangulohan ni Engr. Jerry Maratas.
Sila si National Masters Rommel Ganzon, Arnolito Cadiz ug Rogelio Enriquez Jr. ug mga beteranong sila si Anthony Makinano, Christopher Tubalado ug Carlos Moreno III maoy nag-una sa listahan sa mga lig-ong partisipante ning torneyo nga gipaluyohan sa Celjem Construction and Development Corporation, JEMAR Engineering Services, ARQ Sports, ug Gonzalodo Enterprises.
Mokumbati sab sila si Alleri Somosot, Michael Joseph Pagaran, Joel Pacuribot ug ang mga batan-on apan masaaron nga sila si Chris Aldritz Pondoyo ug John Dave Lavandero.
Gawas sa espesyal nga tropeyo nga gipahinungod sa laing mitaliwan nga haligi sa CEPCA nga si Jun Olis, ang makampiyon sa torneyo mobulsa og P10,000.
Ang mopahiluna sa ikaduha ngadto sa ikalimang dapit makadawat og P7,000, P5,000, P3,000, ug P2,000, ang 6th ngadto sa 10th mokubra og P1,500, ang 11th-15th P1,000, ug ang 16th-25th P500 matag usa.
Samtang ang top 3 sa Cepcans A ug B, ladies, seniors, 8 Under ug 14 Under nga mga entrante adunay insentibo nga P1,500, P1,000, ug P500.
- Latest
