CEBU, Philippines — Si RJ Dinolan miposte og double-double sa dihang gipakaging sa Steadfast Builders ang Purexfit Cebu, 98-88, aron pag-angkon og luna sa semifinals sa Elite Division sa Mandaue’s Pride Basketball Association (MPBA) Commissioner’s Cup Season 3 didto sa Cebu Port Authority (CPA) gym.
Mipupo si Dinolan og 28 puntos, 19 ka rebounds, upat ka assists ug usa ka steal alang sa Steadfast, nga makigharong sa No.1 seed Artera Builders sa Final Four sunod semana. Si Prince Matt Carin mitali og 21 puntos samtang sila si Miguel Gastador ug Genald Inigo nagkumboya'g 22 puntos aron tabangan ang Steadfast nga makasugakod sa gipabuto nga 34 puntos ni Keanu Ray Limana sa Purexfit Cebu.
Si Denniser Mark de la Cerna mitapos uban ang 25 puntos samtang si Rhadie Azarcon dunay 10 puntos sa pilderong Purexfit.
Sa Premier Division, ang Welec naka-angkon pa og laing kinabuhi human gilampaso ang twice-to-beat nga Void, 106-53, sa ilang sangka sa semis.
Sila si Francis Montebon ug JM Sabal nagkumbinar og 47 puntos, si Carlo Bacalso mi-iskor og 20 samtang si James Truz mikadlit og 18 puntos sa balanseng ataki sa Welec.
Si Isiah Nanoy mikulit og 18 puntos samtang sila si Jomarie Bacalso ug Joshua Encabo mitali og 13 ug 10 puntos apan nakawang ang ilang paningkamot alang sa Void.