Coach Jeff milusad sa iyang "Man of a million drills" sports apparel

CEBU, Philippines — Ang tinamod nga Sugbuanong basketball skills trainer nga si Jefferson Codera pormal nga milusad sa iyang  "Man of a million drills" sports apparel niadtong Huybes, Oktubre 31, didto sa TJ Supermart sa Maravilla, Tabuelan.

Sa pagngan sa iyang clothing brand nga naglangkob og mga jersey, shorts, hoodies ug medyas, si coach Jeff nakakuha og inspirasyon gikan sa Amerikano niyang amigo nga si Reggie Hearn, kanhi usa ka propesyonal nga basketbolista nga nakaduwa kadiyot uban sa Detroit Pistons sa NBA.

Si Hearn, nga kasamtangang scout sa San Antonio Spurs, maoy mitawag ni Codera nga "the man with a million drills" sa usa ka artikulo nga gipatik sa usa ka mantalaan didto sa Amerika niadtong 2019.

Giluwatan ni Hearn ang maong pamahayag agi'g pagdayeg sa gipakitang katakos ni Codera atol sa ilang one-on-one training didto California niadtong panahona nga nahimong pundasyon sa solido nilang panaghigalaay. Gikulit ni Codera sa iyang dughan ang mga pulong ni Hearn hangtud sa punto nga gikuha niya ang pangan sa iyang pagtigayon gikan niini.

Usa ka lisensiyadong Gold coach sa USA Basketball, si Codera sakop sa Golden State Warriors training     camp sa NBA sud sa usa na ka dekada.