CEBU, Philippines — Ang Cebu Institute of Technology-University (CIT-U) Wildcats mipakurat sa University of San Jose-Recoletos (USJ-R) Jaguars, 69-63, sa Cebu Schools Athletic Foundation, Inc. (CESAFI) Season 24 basketball tournament didto sa Cebu Coliseum niadtong weekend.
Si Jerian Marc Abello mipaulbo og 27 puntos uban ang tulo ka rebounds ug usa ka steal sa dihang ang Wildcats mikadlit sa ikaduha nilang daog sud sa lima ka sinugdanan.
Sila si Edgar Steven Sajol ug John Patrek Carodsa mihimo sab og kasikas sa Wildcats bitbit ang 12 puntos matag usa.
Si Elmer Echavez mi-iskor og 26 puntos ug milangkat og walo ka rebounds apan wala makakuha og igong suporta sa iyang mga kaubanan hinungdan nga ang Jaguars natagak sa 3-3.
Sa juniors division, siula si Lian Kent Basa ug Coriantumr Cabantog mikuha og atenyison sa dihang gipalukapa sa two-time defending champion Sacred Heart School-Ateneo de Cebu (SHS-AdC) Magis Eagles ang University of the Visayas (UV) Baby Lancers, 64-48.
Si Basa mipupo og 17 puntos, lima ka rebounds, upat ka assists ug usa ka steal samtang si Cabantog midugang og 16 puntos, walo ka rebounds ug duha ka assists alang sa Magis Eagles, nga nagtabla karon sa liderato uban sa USJ-R Baby Jaguars ug University of Cebu (UC) Webmasters bitbit ang managsamang 6-1 win-loss records.
Si Roderick Cambarijan mikolekta og 15 puntos ug 11 ka rebounds samtang si Nathan de la Torre dunay 10 puntos, tulo ka rebounds ug duha ka assists apan walay nahimo gumikan kay ang Baby Lancers nahagsa sa 5-2.,
Sa laing resulta, ang Don Bosco Technical College (DBTC)-Cebu Greywolves madasigong mibangon human malubong og 16 puntos sa naghinapos nga bahin sa first half aron patikalbongon ang Cebu Roosevelt Memorial Colleges (CRMC) Baby Mustangs, 75-73.
Si James Kennedy Plano mirehistro og double-double nga 18 puntos ug 11 ka rebounds, si Carmelson Abangan miamot og 13 puntos ug 10 ka rebounds, samtang sila si Angelo de la Cruz ug Dirk Louis Baguio nagkumbinar og 23 puntos alang sa Greywolves nga miangkon sa ikaduha nilang daog sud sa pito ka duwa.