CEBU, Philippines — Giablihan sa Titan, Knoxout ug Healthy Home ang ilang kampanya pinaagi sa usa ka masipang buto sa Cebu Architects Basketball Club (CABC) 2nd Boysen Cup didto sa Benedicto College-Cebu City Campus gymnasium ning bag-ohay pa lamang.
Si Miggy Aparri mipupo og 21 puntos, usa ka assist ug unom ka rebounds samtang si Wilfredo Lastimosa midugang og 15 puntos, usa ka assist ug lima ka rebounds aron aswaton ang Titan ngadto sa 67-62 nga pagpakaging sa Konstrukt.
Sila si Roldan Bonjoc ug Manuel Niere nagkumboya'g 24 puntos alang sa pilderong Konstrukt.
Sa laing bahin, ang eksplosibong trianggulo nilang Joseph Cabigas, Mark Bajenting, ug Darren Morandante mirehistro tanan og double-double aron pangulohan ang Knoxout ngadto sa 77-67 nga pagpasukarap sa Roof Guard.
Si Cabigas mipabuto og 24 puntos ug 10 ka rebounds, si Bajenting miharos og 20 puntos, 15 ka rebounds, lima ka assists ug usa ka steal, samtang si Morandante mikolekta og 13 puntos ug 16 ka rebounds.
Nagparamdam sab si Euman Neri sa Knoxout uban ang 13 puntos.
Si Miguel Cenabre maoy nangu sa Roofguard bitbit ang 30 puntos ug 15 ka rebounds.
Sa laing resulta, sila si Ferdinand Tiro ug Mark Paradero mitagak og 20 puntos matag usa sa dihang gibugha sa Healthy Home ang Plexibond, 57-46.
Si John Buhawe dunay 11 puntos ug 10 ka rebounds sa nadagma nga Plexibond.