CEBU, Philippines — Si LeBron ug Bronny James mikulit og kasaysayan sa NBA kagahapong adlawa isip labing unang amahan ug anak nga nagkauban og duwa sa usa ka regular season sa dihang gipukan sa Los Angeles Lakers ang Minnesota Timberwolves, 110-103.
Ang mga James, nga nakaduwa kadiyot atol sa usa ka pre-season game batok sa Phoenix Suns sayo ning bulana, nagdungan og sud sa korte didto sa Crypto.com Arena sa naghinapos nga bahin sa ikaduhang kuwarter diin ang Lakers naglabaw og 16 puntos, 51-35. Sila si LeBron ug Bronny gidalitan og makabungog nga abiba sa mga fans sa Lakers sa dihang miadto sila sa scorers table aron mosud sa duwa human ang Lakers nakabentaha og dako.
Sa dihang nagpreparar sila nga mosud sa korte, si Lebron madungog nga misulti ni Bronny og:"You ready? You see the intensity, right? Just play carefree though."
Human sa duwa, si Lebron gibati og tumang kalipay sa laing dungog nga iyang naangkon uban ang kamaguwangan niyang anak.
"That moment -- us checking in together -- is something I'll never forget, no matter how old I get, how my memory may fade as I get older or whatever. I will never forget that moment," buhaghay pa ni LeBron, nga misikad sa mahinungdanon niyang adlaw pinaagi sa pagselebrar sa ika-10 nga sumad sa adlawng natawhan sa anak niyang si Zhuri Nova.
"Everything was just great today, everything -- from the moment I woke up," dugang pa ni Lebron.
"Obviously this is the first time in this beautiful history of the NBA that a father and son have been on the same floor, let alone on the same team. It was pretty cool."