Celtics midominar sa Knicks pagsugod sa ilang depensa

CEBU, Philippines — Si Jayson Tatum mipabuto og 37 puntos sa dihang ang Boston Celtics milusad sa pagdepensa sa ilang titulo pinaagi sa 132-109 nga demolisyon sa New York Knicks pagsugod sa 2024-25 NBA season kagahapong adlawa didto sa TD Garden sa Boston, Massachusetts.

Human sa mabungahon nga seremonyas sa wala pa ang duwa diin giisa sa Boston ang rekord nga ika-18 nilang championship banner, ang Celtics miwadwad og usa ka impresibong salida nga nagpakita nga usa gihapon sila ka lig-ong puwersa alang sa korona.

Ang Celtics mipaulbo og 43 puntos sa unang kuwarter pa lamang aron kontrolahon ang duwa sa hingpit.

Upat sa lima ka starters sa Boston nga sila si Tatum, Jaylen Brown, Derrick White ug Jrue Holiday ang milansang og double-digit nga puntos sa wala pa ang halftime aron tabangan ang Celtics pagposte og 19 puntos nga bentaha, 74-55, human sa first half.

Gawas sa eksplosibo niyang opensa, si Tatum mipasa sab og 10 ka assists ug milangkat og upat ka rebounds.

Si White mi-iskor og 24 samtang si Brown mikadlit og 23 puntos.

Wala sab magpabitin sila si Holiday ug Al Horford nga nagkumboya'g 29 puntos.

Sila si Jalen Brunson ug Miles McBride maoy nangu sa Knicks uban ang 22 puntos matag usa.