MANILA, Philippines — Ang Barangay Ginebra Kings naglaraw nga patikangkangon sa hingpit ang San Miguel Beermen sa game 6 sa ilang best-of-seven PBA Governors' Cup semifinals karong adlawa (Dominggo, Oktubre 20) didto sa Smart Araneta Coliseum.
Ang Gin Kings miposte og 3-2 nga bentaha sa serye human gilampaso ang Beermen, 121-92, sa Game 5 niadtong Biyernes sa gabii didto sa Ynares Sports Center sa Antinpolo City.
Tungod niini, ang Ginebra ni coach Tim Cone nanginahanglan og usa na lang ka daog aron mo-abante sa kampiyonato.
Makab-ot sa Gin Kings ang ilang tinguha kon ugaling molampus sila pagpakukapa sa Beermen sa ilang bugno karong alas 7:30 sa gabii.
Angayan hinoon nga mangandam ang Gin Kings sa usa ka dakong gubat batok sa Beermen gumikan kay naandan na man sa igsoon nilang koponan ang pagresbak sa higayon nga sila mahagba.
Kinsa man gani ang mopatigbabaw sa serye tali sa Ginebra ug San Miguel maoy mosakbang batok sa defending champion TNT Tropang Giga sa finals.
Ang Tropang Giga maoy unang miabante sa katapusang hugna sa torneyo human gipalagpot ang Rain or Shine Elasto Painters luyo sa 113-95 nga kadaogan sa Game 5. Gituldokan sa TNT and ilang serye sa baraha nga 4-1.