Magis Eagles nakasagunson og upat ka daog
CEBU, Philippines — Ang Benedicto College (BC) Cheetahs miinat sa way pilde nilang ratsada ngadto sa tulo ka sagunson nga duwa human gibihag ang University of the Philippines (UP) Cebu Fighting Maroons, 63-56, sa Cebu Schools Athletic Foundation, Inc.(CESAFI) Season 24 basketball tournament niadtong Martes, Oktubre 15, didto sa Cebu Coliseum.
Si Junil Bulan mikadlit og double-double nga 12 puntos ug 10 ka rebounds nga iyang gipalamanan og duha ka assists ug tulo ka steals samtang si Denrick Orgong midonar og 11 puntos, tulo ka rebounds ug usa ka assist sa dihang ang Cheetahs ni coach BJ Murillo mikaratil ngadto sa labing nindot nilang sinugdanan sukad sila miapil ning primerong inter-school nga liga sa Sugbo niadto lamang miaging tuig.
Sikit kaayo ang kumbati sa duha ka kampo apan ang Cheetahs milusad og agresibong ataki sa pinal nga 10 minutos sa aksiyon aron tumbahon ang Fighting Maroons ug duyogan ang University of Cebu (UC) Webmasters sa kinatas-ang dapit sa college division standings bitbit ang parehong 3-0 nga baraha.
Abante lamang og dos puntos, 45-43, human sa tulo ka kuwarter, ang Cheetahs mipasiugda og nagkayong 14-4 rally aron inaton ang ilang labaw ngadto sa 12 puntos, 59-47, sa nahibilin nga kuwatro minutos sa duwa.
Wala na makabangon pa ang Fighting Maroons sukad niadto hinungdan nga naparot sa ikatulong sunod-sunod nga higayon human midaog sa una nilang duwa batok sa Cebu Institute of Technology-University (CIT-U) Wildcats.
Si Matthew Earl Flores maoy nangu sa UP Cebu uban ang 14 puntos ug 11 ka rebounds samtang si AJ de los Santos mikimada og 11 puntos sa pilderong kawsa.
Sa juniors division, ang two-time defending champion Sacred Heart School-Ateneo de Cebu (SHS-AdC) Magis Eagles milampaso sa University of San Carlos (USC) Baby Warriors, 88-63, alang sa ikaupat nilang sagunson nga daog.
Ang Magis Eagles misugat sa duwa pinaagi sa usa ka masipang 16-0 nga buto nga ila pang gipaburot ngadto sa 25-4 human sa unang kuwarter nga nakapabarag sa Baby Warriors sa nahibiling bahin sa duwa.
Sila si Alden Paul Cainglet ug Jelomar Rota nagkumbinar og 29 puntos, upat ka rebounds ug upat ka assists alang sa Magis Eagles, kansang pinakadako nga labaw nagbarog sa 33 puntos, 85-52, sa naghinapos nga bahin sa duwa.
Si Froilan Maglasang mitali og 12 puntos, unom ka rebounds, ug lima ka assists, si Coriantumr Cabantog mi-iskor og 11, samtang si Lars Fjellvang mirehistro og double-double nga 10 puntos ug 14 ka rebounds aron tabangan ang Magis Eagles nga inaton ang ilang rekord ngadto sa 4-1 sama sa University of San Jose-Recoletos (USJ-R) Baby Jaguars nga maoy minutol sa bugtong nilang pilde.
Si Xian Garcia mitagak og 22 puntos uban ang lima ka rebounds, usa ka assist ug tulo ka steals alang sa Baby Warriors. Si Neil Ibarita mitimbre og 13 puntos samtang si Brent Darios Bihag mihipos og 10 puntos apan naminghoy silang tanan kay bokya pa gihapon human sa lima ka duwa.