CEBU, Philippines — Ang nine-time NBA All-Star nga si Paul George nakahiagum og angol sa iyang tuhod sa ikaduha pa lamang niya nga duwa sa pre-season uban sa Philadelphia 76ers.
Nahitabo kini atol sa ilang duwa batok sa Atlanta Hawks diin sila maoy midaog niadtong Martes didto sa State Farm Arena sa Atlanta, Georgia.
Samtang nagbantay ni Jalen Johnson sa first half, wala matarong og plastar ni George ang wala niyang paa nga miresulta sa pagkayayay sa iyang tuhod.
Wala na makatiwas og duwa si George, nga nakamaneho pag-iskor og oto putnos uban ang duha ka rebounds, usa ka assist ug usa ka steal sud sa 12 minutos.
Si George nagkanayon nga kinahanglan eksaminon ang iyang injury apan wala siya mabalaka niini.
"I'm not too concerned about it," dason pa ni George sigun sa taho sa Philadelphia Inquirer.
Sa iyang bahin, si Sixers coach Nick Nurse masaligon nga si George makabalik ra dayon sa aksiyon.
Ablihan sa Sixers ang ilang kampanya sa 2024-25 NBA season batok sa Milwaukee Bucks karong Oktubre 24 (oras dinhi sa Pilipinas).