CEBU, Philippines — Ang defending champion University of San Carlos (USC) Golden Booters mipukan sa University of San Jose-Recoletos (USJ-R) Kicking Jaguars, 2-1, alang sa ikaduha nilang sunod-sunod nga daog sa Cebu Schools Athletic Foundation, Inc. (CESAFI) Season 24 football tournament didto sa Cebu City Sports Center.
Si John Cyril Sinoy milansang og duha ka sagunson nga goals sayes minutos lamang ang gintang sa usa'g usa sa ika-25 ug ika-41 nga minuto aron ituboy ang Carolinians ngadto sa solong liderato sa college division uban ang 2-0 rekord. Naka-iskor si Dylan Kane de la Fuente sa ika-57 nga minuto apan dili kini igo aron paglikay sa Kicking Jaguars nga mahisukamod sa ikaduhang higayon.
Sa laing sangka, ang University of the Philippines (UP) Cebu Fighting Maroons mikadlit sa una nilang daog human gibuntog ang University of Southern Philippines Foundation (USPF) Kicking Panthers,1-0.
Si John Zhrel Sala ang mipabuto sa nakapadaog nga goal sa UP Cebu sa ika-16 nga minuto.
Sa high school category, ang kampiyon nga Don Bosco Technical College (DBTC)-Cebu Greywolves ug ang karibal nilang Sacred Heart School-Ateneo de Cebu (SHS-AdC) Magis Eagles nagtabla sa iskor nga 1-1.
Si Ray Agustine Abuzo sa Don Bosco maoy unang naka-iskor sa ika-48 nga minuto apan ang Magis Eagles nakabawos sab dayon pinaagi sa penalty kick ni Adam Clinton Lee sa ika-54 nga minuto.