14th Alegado Cup: Pulpogan kampiyon sa seniors division

CEBU, Philippines — Gi-sweep sa Pulpogan ang Nangka sa ilang best-of-three finals uban ang 107-100 nga kadaogan sa Game 2 aron sakmiton ang korona sa kampiyonato sa seniors division sa 14th Mayor Teresa "Nene" P. Alegado Cup Fiesta Basketball League didto sa Consolacion, Cebu. Si JC Escalona mipabuto og 26 puntos alang sa Pulpogan, nga maoy midikta sa dagan sa duwa sukad sila miposte og sayong 35-28 nga labaw.

Misamot og kamangtas ang Pulpogan sa ikaduhang kuwarter diin sila milusad og nagkayong 34-22 aron aron paburoton ang ilang bentaha ngadto na sa 19 puntos, 69-50, sa halftime.

Ang Pulpogan mipakgang sa agresibong resbak sa Nangka sa naghinapos nga bahin sa 40 minutos nga aksiyon aron paglakaw uban ang  siyete puntos nga kalamposan.

Si Rexon Moneva dako sab og naambag sa Pulpogan bitbit ang 17 puntos ingon man si Cris Perolino nga mikimada og 10 puntos.

Si Danilo Ponce mitagak og 29 puntos alang sa Nangka. Si Romar Ponce miharos og 23 puntos samtang si Benson Culango mitali og 15 puntos sa pilderong kawsa. (BANAT NEWS)